Bibẹ́nu ohó lọ tọn

Baptẹm osìnmẹ tọn po Tenu núdùdù Oklunọ tọn po yín gbèdide Biblu mẹ tọn he agùn Yisenọ susu lẹ tọn to bibasi, sọlé omẹ dopodopo to bibasi dó to aliho vòvò ji. Ṣigba yè ko hẹn aliho nugbo agùn tintan tọn tọn bú na otànhóhó agùn lẹ tọn wutu. Na owhè susu agùntànhódọtọ lẹ po nújladotọ lẹ po tọn dọ̀n onú susu bo sọ hoavun dogbọn baptẹm tọn dali, bo to Ohó dopolọ zán. Ṣigba yé ma pégo nado wá gbèsisọ mẹ, podọ mọwẹ vogbingbọn lẹ gbẹ́sọ tin kaka jẹ egbè. Yè ma tin to gbèsisọ mẹ po núyiwà agùn he ko jẹnukọnna mí lẹ tọn po fie mí dóna gọ̀yi.

Dogbọn Yisenọ tintan lẹ tọn dali mí hia dọ, “Yé sọ nọte gligli to oplọ́n po kọndopọ apọsteli lẹ tọn po mẹ…” Yé mọdona dọ apọsteli lẹ yín yiylọ gbọn Oklunọ tọn dali bo sọ tindo ojlọjẹ to núdabla he gbọn Ahọludu Jiwheyẹwhe tọn dali. To fọ́nsọnkú Etọn godo, Oklunọ nọ̀hẹ núplọ́ntọ etọn lẹ, “Kaka jẹ azán he gbè yè yí I daga, to godo he É gbọn Gbigbọ Wiwé dali na aṣẹ̀ hlan apọsteli lẹ, he É ṣinyan: mẹhe É do Ede hia hlan ga to ogbẹ̀ to oyaji Etọn godo gbọn ohia nugbo susu dali, bo to awúsọhia hlan yé kaka azán kande, bo sọ to ohó onú he gbọn Ahọludu Jiwheyẹwhe tọn dali lẹ tọn dọ” (OWALỌ 1:2-3). Mí yín homẹhunnọ dọ É dọhó susu dogbọn Ahọludu Etọn dali. Ewọ wẹ mẹhe na aṣẹ̀ yé. To azán Pẹntikọsti tọn gbè, É do Gbigbọ Etọn hlan yé ji bo sọ hùn dohia hlan yé onú he yé dóna wà, podọ lé e dóna yín didètọ́ndo kẹdẹdi ojlo sọgbe Jiwheyẹwhe tọn tọn.

Paul ma tin po yé po sọn bibẹ́nu. Jẹnukọn whẹ́, é ko tindo “núyọnẹn wéhọmẹ tọn” ṣigba to whenuena é yise godo, é dọyẹwhehó wẹndagbe tọn dopolọ po oplọ́n dopolọ po kẹdẹdi lé apọsteli lẹ dọ do. Dogbọn núdohiamẹ dali é jẹ gbejizọnlinji yì Jelusalẹm, to owhè wiẹnẹ godo nado zé azọ́n etọn jlẹdo azọ́n apọsteli lẹ tọn go nado pọ́n, eyín owẹndagbehó etọn sọgbe do apọsteli lẹ tọn go. Eyín ema yín mọ, obú di i na é ma nado wàzọ́n do ovọ́mẹ (GALATIANU 2:1-2).

Owé OWALỌ tọn lẹ po episteli lẹ po dekunnu kọndopọ he sọgbe lọ tọn to núplọ́nmẹ lẹ mẹ, po owẹndagbelátọ ẹnẹ lẹ po, po Alẹ̀nù Hóhó po. Enẹwutu onú depope he apọsteli lẹ zédai na mí wẹ núplọ́nmẹ wiwé po núyíwà lẹ po. Mí ma to ohódọ to ofi dogbọn nukunnumọjẹnugo Pita tọn kavi Paul tọn go gba, ṣigba dogbọn núdohia Ohó Jiwheyẹwhe tọn po Tito Etọn tọn po dali. Kaka jẹ egbè enẹ wẹ onújlẹpò dopolọ ehe dali onú lẹpo dóna yín didohia gbọn.

Whladopo Oklunọ kanbiọ núplọ́ntọ Etọn lẹ dọ, “Bé mìwlẹ ko tunwun onú helẹ pó? Yé sọ dọ hlan ẹn dọ, mọwẹ, Oklunọ. É sọ dọ hlan yé, dọmọ, enẹwutu wẹ wekantọ dopodopo he yè hẹn zùn núplọ́ntọ hlan ahọludu olọn tọn do tin jijlẹ do dawe he yín whènọ de go, ehe to onú yọ́yọ́ po hóhó po dè sọn adọkunnú etọn mẹ jẹgbonu” (MATIU 13:51-52). To whedopodoponu Oklunọ nọ zán gbẹtọ he É ylọ lẹ na azọ́n dèdovo de na Ahọludu Etọn. Yé ma nọ do núyọnẹn wéhọmẹ tọn hia gba, adavo kẹdẹdi lé yè plọ́n yé sọn owéhọ olọn tọn mẹ dó. Yé nọ dọhó kẹdẹdi núyọnẹn olọn mẹ tọn he yè whládo núyọnẹntọ daho ayihọn he mẹ tọn lẹ. Owẹnzagùn Etọn lẹ to whelẹponu nọ hẹn Ohó lọ po Gbigbọ lọ po dopọ. Mọwẹ yé tindo hinhọn po núdohiamẹ ojlo Etọn tọn po bo yọ́n lé yé zán ẹn dó to gbèsisọ mẹ. Ohia magbọvọ ehe tọn wẹ yín dọ, yẹwhehó yetọn tin to gbèsisọ mẹ po Owé Wiwé lẹpo po. Oklunọ mítọn po apọsteli lẹ po tindo Alẹ̀nù Hóhó kẹdẹ na núzinzán yetọn to ojlẹ nẹ mẹ. Nado vọ́ dọ, yé nọ dlẹn alọ do e. To Alẹ̀nù Yọ́yọ́ mẹ, mí mọ owéhihia fẹnẹ-kande-atọ́n (845) sọn Alẹ̀nù Hóhó mẹ.

Yẹwhehódọtọ owẹndagbe tọn to egbè lẹ tindo azọ́n titegbe de to Jiwheyẹwhe nukọn. Omẹ depope he to devizọ́nwà to Ahọludu Jiwheyẹwhe tọn mẹ, dóna tindo adọgbo nado zéjlẹ do Paul po apọsteli he pò lẹ po tọn go to onú depope he é to pinplọ́n omẹ bo sọ to bibasi mẹ. Eyín e ma sọgbe po ogbèdide dòdonu lọ tọn po, po núwiwà lọ tọn po, whenẹnu nújẹagọ de to finẹ. Eyín e yín núvivẹ de to Paul nukunmẹ nado zé núplọ́nmẹ etọn jlẹdo núplọ́nmẹ apọsteli lẹ tọn go na é nido do kandeji dọ é ma to azọ́nwà to ovọ mẹ. Na wẹ mẹdepope to mí mẹ na gbẹ́kọ enẹ go nado basi i do? Dogbọn onú dagbe he tọ́n sọn Jiwheyẹwhe de tọn lẹ dali, mí nọ mọ lẹ́jẹ etọn po ehe yè basi po he mí ma sọgan jlẹdo dagbe lọ go gba.

To owẹn he yè dohlan agùn Efesu tọn mẹ, mí hia dọ, “…bo ko sọ whle yé he dọmọ apọsteli wẹ yé lẹ pọ́n bọ yé ma sọ yín mọ, bo sọ yí yé do mọ lalonọ” (OSỌHIA 2:2). Owhẹ̀dida he yín bibasi, na sisètọ lẹ zé ehe yè dọyẹwhehó etọn hlan yé lẹ, jlẹdo onúplọ́nmẹ dòdonu apọsteli lẹ tọn go. Yé he yise to Biblu mẹ lẹ do ayi e go dọ gbẹtọ helẹ to yéde lẹ ylọ dọ apọsteli lẹ poun wẹ, ṣigba to nugbo de mẹ lalonọ wẹ yé, na yé ma dọyẹwhehó owẹn nugbo Jiwheyẹwhe tọn tọn kẹdẹdi lé apọsteli he jẹnukọn lẹ dọ dó gba.

To agùn tintan mẹ, ayihúndida matin dogbọn Baptẹm Osìnmẹ tọn dali gba, Tenu núdùdù Oklunọ tọn, po núplọ́nmẹ he pò lẹpo po. Oklunọ ko ná ohónamẹ Etọn dogbọn lé onú nẹlẹ dóna yín bibasi dó tọn dali. Enẹwutu, É dọ dogbọn mẹhe É sẹ́do lẹ tọn dali, “Mẹhe sè mìtọn, é sè ṣie” (LUKU 10:16). Mí na dohia to nukọnyìyìmẹ lé yè detana Baptẹm po Tenu núdùdù Oklunọ tọn po dó to Owé Wiwe lẹ mẹ. Po Tenu núdùdù Oklunọ tọn po, mí na mọ Afọkiklọ bọdego ehe ji mí na tá hinhọn Ohó Oklunọ tọn do to kleunmẹ.

Owhèsun wiawetọ, 1986.